Hamza flet për bashkëpunimet pas zgjedhjeve: Vija të kuqe nuk kemi për askënd
Demokracia
22:23 | 04 Qershor 2026
Share:
Share
Tweet
Kryetari i Partisë Demokratike të Kosovës (PDK) dhe kandidati për kryeministër, Bedri Hamza, ka deklaruar se pas zgjedhjeve të 7 qershorit partitë politike duhet të ulen dhe të diskutojnë për formimin e institucioneve të reja, duke theksuar se ai nuk vendos vija të kuqe ndaj asnjë subjekti politik.
Në Debat Plus, Hamza tha se ka qenë vazhdimisht kundër politikës së vijave të kuqe, të cilën e konsideron të dëmshme për vendin dhe për funksionimin e demokracisë.
Ai theksoi se PDK-ja mbetet e hapur për bisedime me të gjitha partitë parlamentare pas zgjedhjeve, duke mos përjashtuar asnjë mundësi bashkëpunimi politik.
“Me të 8-tin paritë politike duhet me u ul. Unë asnjëherë nuk kam vendosur vija të kuqe. Edhe në këtë temë kam pas konsistencë dhe besoj i vetmi… vija të kuqe s’kam qit dhe tash s’kam vija të kuqe. Se konsideroj që janë treguar të dëmshme për vendin…
Çka ka këtu edhe një konstante. Deri tash veç PDK-ja s’ka qenë në qeverisje me LVV-në. Dhe i bie që ne nuk përjashtojmë mundësinë të bisedojmë më gjithë subjektin dhe spektrin politik. Çka unë besoj shumë partitë, se unë preferoj me qeverisë me LDK-në, AAK-në dhe deputetë tjera brenda Kuvendit. Për shkak edhe të afërsive programore, vizonit dhe koncepteve tona”, ka thënë Hamza.
Bedri Hamza, ka kritikuar vendimin e Qeverisë për ndarjen e nga 100 eurove për pensionistët, fëmijët, studentët dhe sektorin privat në prag të zgjedhjeve të 7 qershorit.
Megjithatë, Hamza ka thënë se nuk është kundër ndihmës për qytetarët, por se këto masa duhet të jenë të rregullta dhe të bazuara në ligj, duke kaluar përmes procedurave të Kuvendit të Kosovës.
Sipas Hamzës, praktika të tilla ndikojnë në pabarazinë e garës zgjedhore.
“Zgjedhjet besoj që kanë me qenë të lira, se duhet me qenë të lira. Por, nuk janë të ndershme, nuk janë të barabarta. Nuk janë të ndershme dhe nuk janë të barabarta. Unë nuk jam kundër të iu ndihmohet qytetarëve të Kosovës. A janë të njëhershme a janë të përhershme është dallim shumë i madh. Qytetarëve të Kosovës duhet me iu ndihmu, por duhet me ligj. Buxheti është kompetencë ekskluzive për aprovim i Kuvendit. Qeveria e përgatit dhe e procedon. Këta e kanë krijuar një praktikë të keqe që e lënë një fond kontigjent, që ka ngel dhe e kanë trashëguar, e kanë keqpërdor. Kanë abuzuar me parti publike, prej pandemisë duke thënë një kontigjencë pr masën 2,3,4”, ka thënë Hamza.
www.facebook.com
